त्रिचन्द्र क्याम्पस पुनर्निर्माण हुने

2018-10-12

Ekantipur


काठमाडौं (कास)– मुलुकको पुरानो कलेज त्रिचन्द्र क्याम्पस पुनर्निर्माण हुने भएको छ । त्यसनिम्ति राष्ट्रिय पुनर्निर्माण प्राधिकरणले भूकम्पबाट क्षतिग्रस्त संरचनाको पुनर्निर्माण तथा गुरुयोजना तयारी छलफल अघि बढाएको छ । बिहीबार प्राधिकरणका प्रमुख कार्यकारी अधिकृत सुशील ज्ञवाली नेतृत्वको टोलीले त्रिचन्द्र क्याम्पसका प्रमुखसहितको टोलीसित छलफल गरेको हो ।

‘त्रिचन्द्र क्याम्पसको एउटा बृहत् गुरुयोजनासहित पुनर्निर्माण गर्नेबारे छलफल भएको छ,’ प्राधिकरणद्वारा बिहीबार जारी विज्ञप्तिमा छ, ‘रानीपोखरीसँगै रहेको त्रिचन्द्र क्याम्पसको ऐतिहासिक भवनको संरक्षण गरी उपयोगमा ल्याउने तथा क्याम्पसको पुनर्निर्माणलाई समन्वयात्मक ढंगले अघि बढाउने प्रस्ताव भएको छ ।’

छलफलमा क्याम्पस प्रमुख प्रदीपबहादुर न्यौपाने, क्याम्पसका भूगर्भ विभागका प्रमुख अनन्तप्रसाद गजुरेल, मेघराज ढकाल, रमेश थापालगायत सहभागी थिए ।