कृषि विश्वविद्यालयद्वारा वार्ता समिति गठन

2018-07-24

Share this on:

चितवन, ८ साउन (रासस) ः कृषि तथा वन विज्ञान विश्वविद्यालयले आठ निजी क्याम्पसलाई सम्बन्धन दिएपछि उत्पन्न विवाद समाधान गर्न विश्वविद्यालयले पाँच सदस्यीय वार्ता समिति गठन गरेको छ । 

कार्यकारी परिषद्को बैठकले निजी क्याम्पसलाई सम्बन्धन दिएसँगै विद्यार्थी र प्रध्यापक आन्दोलित भएका छन् । आन्दोलनलाई हल गर्न भन्दै विश्वविद्यालयका उपकुलपति प्रा डा ईश्वरीप्रसाद ढकालले विश्वविद्यालयका पूर्वरजिष्ट्रार प्रा डा सूर्यकान्त घिमिरेको संयोजकत्वमा विश्वविद्यालयकै चार उच्च पदाधिकारी रहेको समिति गठन गर्नुभएको हो । 

कृषि तथा वन विज्ञान विश्वविद्यालय रामपुर चितवनले निजी क्याम्पसलाई सम्बन्धन दिएको विरोधमा आन्दोलन गर्दै आएका विभिन्न विद्यार्थी संगठनको संयुक्त आयोजनामा मंगलबार भएको अन्तरक्रिया कार्यक्रममा सहभागी नेकपाका केन्द्रिय सदस्यद्धय ठाकुर गैंरे र लेखनाथ न्यौपानेलगायत । तस्वीर ः नारायण ढुंगाना, रत्ननगर, (चितवन), रासस


समितिका सदस्यमा अनुसन्धान तथा प्रसार निर्देशक प्रा डा नवराज देवकोटा, पोष्टग्य्राजुएट कार्यक्रम संयोजक प्रा डा भूमिनन्द देवकोटा, कृषि सङ्काय(शिक्षण) सहायक डीन प्रा डा कल्याणी मिश्र र विश्वविद्यालयका योजना निर्देशक प्रा डा अर्जुनकुमार श्रेष्ठ रहनुभएको छ । 

गत असार २० गते निजी सम्बन्धनको निर्णय भएपछि असार २६ गतेदेखि विश्वविद्यालयमा तालाबन्दी गरी आन्दोलन भइरहेको छ । विश्वविद्यालयले आन्दोलनरत विद्यार्थी र प्रध्यापकसँग विस्तृत छलफल एवं संवाद गरी आन्दोलरत पक्षको मागलाई ध्यानमा राखी विश्वविद्यालयको निर्णय प्रभावकारी ढंगले कार्यान्वयन गर्न गराउन र शैक्षिक तथा प्राज्ञिक वातावरणलाई सुदृढ गरी दीर्घकालीन निकासका लागि आवश्यक राय सुझावसहितको प्रतिवेदन पेश गर्न समिति गठन गरेको हो । 

समितिले आन्दोलनरत सबैसँग छलफल तथा वार्ता गरी स्थायी समाधानका लागि उपयुक्त रायसुझावसहितको प्रतिवेदन पेश गर्ने उपकुलपति प्रा डा ढकालले बताउनुभयो ।